Dié jaar by die Universiteit Stellenbosch Museum
Die Universiteit Stellenbosch Museum is 'n toonaangewende 21ste-eeuse museum. Dit is geleë in die geskiedkundige universiteitsdorp Stellenbosch, wat deel uitmaak van die bekende wyntoerismestreek van die Kaapse Wynland. Die Universiteitsmuseum is die trotse ontvanger van die Kaapse Wynland-distriksmunisipaliteit se burgemeesterstoerismeprys vir volhoubare ontwikkeling. Daarbenewens is die museum se werk om maatskaplike inklusiwiteit teweeg te bring met 'n toekenning van die Wes-Kaapse Departement van Kultuursake bekroon.
Museumligging
Die Universiteitsmuseum is geleë by Ryneveldstraat 52, Stellenbosch.
Ure
Die museum is oop van 09:00 tot 16:30 op Maandae tot Vrydae, en van 08:00 tot 12:30 op Saterdae. Gesluit op Sondae en openbare vakansiedae. Toegang tot die museum is gratis.
Kontakbesonderhede
Vir meer inligting, kontak gerus die Universiteitsmuseum by +27 (0)21 808 3695 of usmuseum@sun.ac.za, of raadpleeg ons webtuiste by www.sun.ac.za/museum.
Woensdagkunswandelinge
Met sy Woensdagkunswandelinge stel die Universiteit Stellenbosch Museum die kunsversameling ten toon wat die Universiteit die afgelope 100 jaar opgebou het. Vanaf Februarie 2019 bied die museum elke eerste Woensdag van die maand (buiten 1 Mei, Werkersdag) rondleidings van kunswerke uit die Universiteit se permanente kunsversameling aan. Die Woensdagkunswandelinge is gratis vir alle lede van die publiek, en vind gedurende die etensuur van 13:00 tot 14:00 plaas.
| Datum: | Tema: | Tyd: |
| 13 Februarie 2019 | Forward? Forward! Forward . . . | 13:00–14:00 |
| 16 Februarie 2019 (Saterdag) | Forward? Forward! Forward . . . | 10:00–11:30 |
| 6 Maart 2019 | Forward? Forward! Forward . . . | 13:00–14:00 |
| 3 April 2019 | Forward? Forward! Forward . . . | 13:00–14:00 |
| 8 Mei 2019 | Maggie Laubser | 13:00–14:00 |
| 5 Junie 2019 | Irma Stern | 13:00–14:00 |
| 3 Julie 2019 | Solomon Caesar Malan | 13:00–14:00 |
| 7 Augustus 2019 | John Muafangejo | 13:00–14:00 |
| 4 September 2019 | Willie Bester | 13:00–14:00 |
| 2 Oktober 2019 | William Kentridge | 13:00–14:00 |
| 6 November 2019 | Christo Coetzee | 13:00–14:00 |
| 4 Desember 2019 | Auguste Rodin | 13:00–14:00 |
Vorentoe Vrydag
As deel van die Universiteit Stellenbosch se Eeufeesprogram bied die Universiteitsmuseum 'n Eeufeesuitstalling aan. Hierdie eksperimentele uitstalling getiteld Forward? Forward! Forward . . . het op 5 Desember 2018 geopen, en is nog tot 31 April 2019 te sien.
'n Keur van 100 kunswerke deur sowel gevestigde as ontluikende kunstenaars is by dié gedagteprikkelende groepuitstalling ingesluit. In 'n oop versoek is kunstenaars gevra om kunswerke voor te lê wat die toekoms van die hoër onderwys oor die volgende 100 jaar uitbeeld. Die eindresultaat is innoverend en boeiend, en stimuleer debat en gesprekvoering oor die toekoms van die Universiteit Stellenbosch én van hoër onderwys in Afrika.
Vorentoe Vrydag is 'n gespreksreeks wat deur hierdie uitstalling geïnspireer is.
| Datum: | Gassprekers: | Tema: | Tyd: |
| 6 Februarie 2019 (Woensdag) | Drs Morné Mostert en Njeri Mwagiru (onderskeidelik direkteur en senior futuris van die Instituut vir Toekomsnavorsing, Universiteit Stellenbosch) en Robyn-Leigh Cedras en Maurice Mbikayi (kunstenaars) | Die toekoms van hoër onderwys in Afrika | 18:00–20:00 |
| 8 Februarie 2019 | Deidre Samson, Instituut vir Toekomsnavorsing, Universiteit Stellenbosch | Die toekomstige werkplek en die hoër onderwys | 13:00–14:00 |
| 15 Februarie 2019 | Ashley Walters in gesprek met Robyn-Leigh Cedras, Liza Grobler en Strijdom van der Merwe (kunstenaars) | Kunstenaars se ervaring van en betrokkenheid by die Forward-uitstalling | 13:00–14:00 |
| 22 Februarie 2019 | Prof Nuraan Davids, medeprofessor in die Filosofie van Onderwys, Universiteit Stellenbosch | Akademiese vryheid en “ontuitnodiging" in die hoër onderwys | 13:00–14:00 |
| 1 Maart 2019 | Prof Ronelle Carolissen, Departement Opvoedkundige Sielkunde, Universiteit Stellenbosch | Is MISkenning die sleutel tot die toekoms van die hoër onderwys? | 13:00–14:00 |
8 Maart 2019 | Doris Viljoen, senior futuris van die Instituut vir Toekomsnavorsing, Universiteit Stellenbosch | Kentekens of kwalifikasies? | 13:00–14:00 |
| 15 Maart 2019 | Prof Jonathan Jansen, Fakulteit Opvoedkunde, Universiteit Stellenbosch | Radikale verandering en die probleem van die institusionele kurrikulum | 13:00–14:00 |
| 5 April 2019 | Prof André Roux, akademiese konvenor van die NGDip & MPhil in Toekomsstudie, Instituut vir Toekomsnavorsing, Universiteit Stellenbosch | Demografiese dividend of jeug in krisis | 13:00–14:00 |
| 12 April 2019 | Dr Morné Mostert, direkteur van die Instituut vir Toekomsnavorsing, Universiteit Stellenbosch | Alternatiewe Afrikatoekomste | 13:00–14:00 |
| 26 April 2019 | Prof Yusef Waghid, professor in die Filosofie van Onderwys, Universiteit Stellenbosch | Oor die toekoms van onderrig in die hoër onderwys | 13:00–14:00 |
100 Artefakte-rondleidings
Die Rektor van die Universiteit Stellenbosch (US) het die uitstalling 100 Artefakte vir 100 Jaar in 2018 as deel van die US se Eeufeesvieringe in die Universiteitsmuseum geopen. Die uitstalling, wat deur die Rektor self aangevoor is, beeld die US se 100-jarige bestaan uit deur die aanbieding van 100 voorwerpe van kultuurhistoriese belang.
Die 100 artefakte verteenwoordig nie elk van die 100 jaar nie en vertel ook nie die volle verhaal van hoe die Universiteit se geskiedenis verloop het nie. Dit is bloot 'n wye verskeidenheid voorwerpe wat met die Universiteit verband hou en die verskillende fakulteite, administratiewe afdelings, studentekoshuise en kultuurbedrywighede verteenwoordig. Van die items kom uit die tydperk voordat die Universiteit amptelik gestig is, maar is inderdaad later deur die instelling gebruik.
Prof Matilda Burden bied die hele jaar deur 'n aantal rondleidings van die uitstalling aan:
Datum: Uitstalling: Tyd:
7 Februarie 2019 100 Artefakte vir 100 Jaar 13:00–14:00
5 Maart 2019 Bloemhofskool-herinneringe en US-geskiedenis 13:00–14:00
7 Maart 2019 100 Artefakte vir 100 Jaar 13:00–14:00
11 April 2019 100 Artefakte vir 100 Jaar 13:00–14:00
9 Mei 2019 100 Artefakte vir 100 Jaar 13:00–14:00
6 Junie 2019 100 Artefakte vir 100 Jaar 13:00–14:00
5 September 2019 100 Artefakte vir 100 Jaar 13:00–14:00
17 Oktober 2019 100 Artefakte vir 100 Jaar 13:00–14:00
7 November 2019 100 Artefakte vir 100 Jaar 13:00–14:00
Dinsdag-Afrikatromslaansessies
Dinsdag-Afrikatromslaansessies bied studente, personeel en lede van die gemeenskap van Stellenbosch en omgewing die geleentheid om die Afrikatrom te leer slaan. Die tromslaansessies word aangebied deur Vuyo Mgijima, 'n ervare tromspeler van Kayamandi, wat reeds die afgelope 16 jaar sy passie vir tromslaan met plaaslike inwoners sowel as internasionale toeriste deel.
Om die Afrikatrom te slaan is volgens Vuyo uiters ontspannend en terapeuties, verlig spanning en moedig kreatiwiteit aan. Dit is ook 'n goeie manier om prestasie in die werkplek te verhoog en spangees en sosiale samehang te bou.
Die tromslaansessies is gratis vir almal. Tog is daar slegs tien tromme per sessie beskikbaar, so belangstellendes word aangeraai om vooraf te bespreek. Diegene wat eerste kom, word eerste bedien.
Datum: Tyd:
19 Februarie 2019 13:00–14:00
12 Maart 2019 13:00–14:00
16 April 2019 13:00–14:00
14 Mei 2019 13:00–14:00
4 Junie 2019 13:00–14:00
9 Julie 2019 13:00–14:00
6 Augustus 2019 13:00–14:00
3 September 2019 13:00–14:00
8 Oktober 2019 13:00–14:00
Nelson Mandela-kollokwium
Die Universiteit Stellenbosch Museum bied elke jaar in vennootskap met die Nelson Mandela Museum 'n Nelson Mandela-kollokwium aan. Die kollokwium bring akademici, studente en gemeenskapslede byeen om oor die tema van die jaar te besin.
Datum: 26 Julie 2019 / Tyd: 18:00
Tussengenerasiegesprek oor rassisme en menseregte
Die tussengenerasiegesprek oor rassisme en menseregte bring akademici, studente en die gemeenskap van Stellenbosch byeen om 'n oop gesprek oor rassisme te voer. Hierdie program, wat deel uitmaak van Menseregtemaand in Maart, word gereël in samewerking met raadslid Adams, wat jare lank reeds 'n veldtog teen rassisme voer. Die hoofdoel van die program is om 'n nierassige toekoms te help bou. Die program strook met die Universiteit Stellenbosch se strategiese doelwit om 'n florerende universiteit te bou.
Datum: 20 Maart 2019 / Tyd: 18:00
Filmvertonings
Die Universiteit Stellenbosch Museum wil graag 'n kernrol vervul om die Universiteit as 'n plek van skakeling, herinnering, erfenis, debatvoering en kreatiwiteit te posisioneer. Hiervoor bied die museum elke jaar onder meer vier filmvertonings aan. Die doel is om 'n verskeidenheid belangegroepe, van studente en alumni tot lede van die Stellenbosse gemeenskap, te betrek. Die filmvertoningsprogram vir 2019 is soos volg:
Whispering Truth to Power
Whispering Truth to Power vertel die spannende verhaal van Thuli Madonsela se laaste jaar as Suid-Afrika se Openbare Beskermer. Terselfdertyd beeld dit op boeiende wyse haar lewe as prokureur, ma en vrou uit en bied insig in heelparty kernkwessies waarvoor Suid-Afrika deesdae te staan kom, onder meer voortslepende ongelykheid, rassespanning, grondherverdeling en korrupsie.
Datum: 11 April 2019 / Tyd: 18:00
The Last White President: Deel 1
Hierdie tweedelige dokumentêr, wat twee onderhoude met voormalige president FW de Klerk en ander betrokkenes by Suid-Afrika se vredesproses insluit, bied 'n kykie na De Klerk se enigmatiese persona wanneer die wêreld se oë nié op hom is nie. Die kyker sien hoe hy vir gesprekke en openbare geleenthede voorberei, en neem oor die bestek van 'n jaar sy interaksie waar met ondervraers wat op soek is na beslissende antwoorde. Wat het hom aangespoor om die beëindiging van apartheid te oorweeg?
Datum: 27 Junie 2019 / Tyd: 18:00
The Last White President: Deel 2
Hierdie tweedelige dokumentêr, wat twee onderhoude met voormalige president FW de Klerk en ander betrokkenes by Suid-Afrika se vredesproses insluit, bied 'n kykie na De Klerk se enigmatiese persona wanneer die wêreld se oë nié op hom is nie. Die kyker sien hoe hy vir gesprekke en openbare geleenthede voorberei, en neem oor die bestek van 'n jaar sy interaksie waar met ondervraers wat op soek is na beslissende antwoorde. Wat het hom aangespoor om die beëindiging van apartheid te oorweeg?
Date: 26 September 2019 / Tyd: 18:00
Home Fire
Home Fire ondersoek gesinsgeweld en herstellende geregtigheid uit die oogpunt van Kanadese inboorlinge. Dit bevat kommentaar deur die oudstes van stamme, gemeenskapsleiers en lede van die Westerse regstelsel. Home Fire verken die kolonisasie van Kanada, historiese trauma, die Westerse regstelsel, en voetsoolvlakgenesing in inboorlinggemeenskappe.
Datum: 31 Oktober 2019 / Tyd: 18:00
Netwerkmiddagete vir geregistreerde toergidse
Die Universiteit Stellenbosch Museum en die Wes-Kaapse Departement van Ekonomiese Ontwikkeling en Toerisme bied jaarliks 'n netwerkmiddagete vir alle geregistreerde toeroperateurs en toergidse in die Wes-Kaap aan.
By dié geleentheid kry toeroperateurs en toergidse die geleentheid om met mekaar kennis te maak en met kernrolspelers in die bedryf skouers te skuur. Die direkteur van die Universiteitsmuseum en die registrateur van die Wes-Kaapse Toergidsregister tree as gashere op.
Datum: 10 Julie 2019 / Tyd: 13:00
Bied jou volgende geleentheid by die Universiteit Stellenbosch Museum aan
Die historiese voorportaal met sy dubbelvolumeplafon en dramatiese houtwerk is groot genoeg om 150 gaste in gemak en styl te onthaal. Dit is die ideale ruimte vir 'n boekbekendstelling, die vrystelling van 'n nuwe produk, of 'n belangrike persaankondiging. Sitplek kan na gelang van die tipe geleentheid en die getal gaste gereël word.
Die lesingsaal het sitplek vir 40 in 'n klassieke klaskamerstyl, met ingeboude lessenaars en regop stoele, 'n podium, 'n kateder, 'n projeksieskerm wat kan terugtrek, sowel as 'n dataprojektor. Die lokaal is toegerus met stereoklank en 'n kabelmikrofoon by die kateder. Internet is ook beskikbaar vir kliënte van binne die Universiteit. Die lesingsaal spog boonop met ultramoderne telekonferensiegeriewe, waarvoor spesiale tariewe geld.
Die binnehof is 'n nuwe onthaalarea by die museum en is volmaak vir buitegeleenthede soos 'n skemerkelkonthaal, tradisionele braai of wynproe. Die binnehof het plek vir tot 200 gaste.
Die agterportaal is 'n funksionele, lang ruimte wat veral goed werk as 'n area vir kosbereiding of -bediening vir geleenthede wat in een van die ander lokale plaasvind.
Daarbenewens beskik die museum oor 'n hipertegnologiese raadsaal vir vergaderings en aanbiedings, met sitplek vir 20. Gebruik van die raadsaal sluit gratis WiFi en internet in.
Alle museumlokale bied 'n verskeidenheid oudiovisuele toerusting, tafels, stoele, 'n podium en klank. Die Universiteit Stellenbosch Museum lewer nie self 'n spysenieringsdiens nie, maar kan spyseniersmaatskappye aanbeveel wat op kontrak vir die Universiteit werk.
Huurtariewe vir die verskillende lokale by die Universiteitsmuseum is soos volg:
| Museumlokaal: | Tarief per uur: | Tarief per dag: |
Voorportaal Lesingsaal (sitplek vir 40) | R1 500 R700 | R6 000 R5 000 |
| Binnehof | R900 | R5 000 |
| Agterportaal (vir spyseniering) | R400 | R3 200 |
| Raadsaal (sitplek vir 20) | R700 | R5 000 |
Huidige uitstallings by die Universiteit Stellenbosch Museum
| Uitstalling: | | Tydsduur: |
100 Artefakte vir 100 Jaar | | 31 Oktober 2018 tot 2020 |
Forward? Forward! Forward . . . | | 5 Desember 2018 tot April 2019 |
Universiteit Stellenbosch: Verlede Hede Toekoms | | Permanent |
| Bloemhofskool-herinneringe | | Permanent |
Museumkunde- en erfeniskursusse van die Universiteit Stellenbosch Museum
Die Universiteit Stellenbosch Museum is die enigste museum in Suid-Afrika wat formele opleiding in museumkunde aanbied. Kortkursusse van drie dae (15 uur) elk kan op aanvraag op enige plek in die land aangebied word.
Die kursusaanbod behels “Inleiding tot Museumkunde", “Erfenisbewaring", “Boustyle", “Meubelstudie" en “Africana-skilderkuns". Die kursusse is geakkrediteer, en suksesvolle kandidate ontvang 'n bevoegdheidsertifikaat.
Vir meer inligting, kontak die aanbieder, prof Matilda Burden, by mb4@sun.ac.za of 021 808 2002.
Toegang tot die visuele kunste vir skoolleerders
Hierdie program strook met die nasionale Kurrikulumassesseringsbeleidsverklarings (KABV) en is ontwerp om leerders se toegang tot die Universiteit Stellenbosch Museum te verbreed. Die hoofdoel is om leerders aan die visuele kunste, geskiedenis en erfenis bekend te stel.
Om ekonomiese redes kry weinig leerders uit benadeelde omgewings die geleentheid om museums te besoek. Om skooldeelname aan die program te help fasiliteer, dek die Universiteitsmuseum dus die reiskoste van 15 leerders per skool. Middagete word ook aan die leerders voorsien. Bystand is beperk tot voorheen benadeelde skole binne 'n omtrek van 120 km van Stellenbosch.
'n Volledige program is beskikbaar op aanvraag. Vir skoolbesprekings en navrae, kontak me Natasha Coltman by 021 808 3691 of ncoltman@sun.ac.za.
