Opsomming (“Blurb") | Volgens Cook-Sather (2010:555): “the most engaging, meaningful, and enduring education is that which affords students the opportunity to be actively involved – to be actors in their own learning." Met dít in gedagte het ek in 2017 ʼn opsionele videoprojek in Strafreg 171, ʼn verpligte jaarmodule vir eerste- en tweedejaar-regstudente, bekendgestel. Die projek het werk in groepe van vyf behels, en ongeveer ʼn derde van die klas van 300 studente het filmuittreksels van 60 tot 90 sekondes ingehandig wat strafregverwante konsepte, gevalle of kwessies illustreer en verduidelik. Die uittreksels moes hul klasmaats op ʼn akkurate, verbeeldingryke, vermaaklike, interessante en oorspronklike manier rakende die regte opvoed en inlig. Die filmuittreksels is in die klas vertoon, met pryse vir die beste voorleggings, wat ook op SUNLearn beskikbaar gestel is. ʼn Videoprojek is beslis die soort intervensie wat deur enige akademikus oorweeg kan word wat aan studente ʼn alternatiewe – en kreatiewe – meganisme wil gee om hul leer te demonstreer (Willmott 2015). Dit het minimale ekstra werk van die dosent geverg, aangesien dit vrywillig en studentgedrewe was. Assessering was vinnig en eenvoudig – die uittreksels was kort, groepwerk het die totale getal voorleggings verminder, en die punt toegewys was ʼn alles-of-niks ekstra 2% krediet wat by die jaarpunt van studente gevoeg is wat aan die voorgeskrewe kriteria voldoen het. ʼn Videoprojek soos dié hou talle moontlike voordele in. Die maak van filmuittreksels het oënskynlik studentgesentreerde, aktiewe en samewerkende leer aangemoedig. Dit het aan studente die geleentheid gegee om te leer terwyl hulle hul eweknieë onderrig en oor die leerproses te besin. Die kreatiewe dimensie het gehelp om regstudente uit te daag om verby hul instinktiewe regsvoorkeur vir die (linkerbrein-) opeenvolgende en verbale na die meer (regterbrein-) visuele, kreatiewe leermetode te beweeg, waardeur ʼn meer "heelbrein-", gebalanseerde leeroriëntasie bevorder is. In my aanbieding gebruik ek gekose uittreksels van die studente se videos om te illustreer en te demonstreer hoe my gewenste akademiese uitkomste van meer holistiese, inklusiewe en aktiewe leer deur hierdie intervensie bereik is. |