Erkenning vir US-onderriggenote
Tydens die jaarlikse Toekennings vir Voortreflike Onderrig en Navorsing op 4 Desember 2018 by STIAS het vyf akademici van die US sertifikate ontvang uit erkenning vir die voltooiing van hul Onderriggenootskappe. Proff Elmarie Costandius, Ian Nell, Dana Niehaus, Nicola Plastow en Geo Quinot het hul genootskappe tussen 2011 en 2017 voltooi.
Prof Arnold Schoonwinkel, Viserektor: Onderrig en Leer, wat die sertifikate oorhandig het, het die geleenthede beklemtoon vir US-dosente om as deel van die professionalisering van hul onderrigrol ook onderrignavorsing te onderneem. Voorbeelde van sodanige geleenthede is die jaarlikse SoTL-konferensie en die FINLO/FIRLT-skenkings. Prof Schoonwinkel het akademici se professionele onderrigreis 'n “progressiewe roete" genoem wat tot 'n US-onderriggenootskap en, uiteindelik, tot die nasionale genootskap vir Teaching Advancement at University (TAU) kan lei.
Die US-onderriggenootskapskema bied die geleentheid vir voortreflike opvoeders en vakkundiges in onderrig en leer om meer dikwels vir volgehoue tydperke, en met verskillende vorme van ondersteuning, op aspekte van vernuwing, verkenning en verspreiding van goeie praktyk in departemente en fakulteite te fokus.
Die huidige onderriggenootskapontvangers is:
· Prof Ingrid Rewitzky (Visedekaan: Onderrig en Leer, Fakulteit Natuurwetenskappe)
· Dr Elize Archer (Sentrum vir Gesondheidsberoepe Onderwys, Fakulteit Geneeskunde en Gesondheidswetenskappe)
· Dr Berna Gerber (Afdeling Spraak‐, Taal‐ en Gehoorterapie, Fakulteit Geneeskunde en Gesondheidswetenskappe)
· Me Marianne McKay (Departement Wingerd‐ en Wynkunde, Fakulteit AgriWetenskappe)
· Dr Michael Schmeisser (Departement Hortologie, Fakulteit Natuurwetenskappe)
· Dr Marianne Unger (Afdeling Fisioterapie, Fakulteit Geneeskunde en Gesondheidswetenskappe)
Enige vrae oor die Onderriggenootskappe kan aan dr Karin Cattell-Holden, kcattell@sun.ac.za of X 3074, gerig word. Meer inligting oor die SoTL-konferensie en die FINLO/FIRTL-skenkings is op die Sentrum vir Onderrig en Leer se webwerf by http://www.sun.ac.za/ctl beskikbaar.
