Professor Soon Nel, hoogleraar in Bestuursrekeningkunde en Finansiële Bestuur en adjunkdirekteur van die Skool vir Rekeningkunde, het sy intreerede op 10 Mei gelewer.

Hy is deur prof Ingrid Woolard, dekaan van die Fakulteit Ekonomiese en Bestuurswetenskappe, bekend gestel. Sy het onder meer gesê dat sy belangrikste navorsingsbelangstellings ekwiteitswaardasies, kapitaalbegrotings en samesmeltings en oornames insluit.

In sy lesing met die titel The quick, rough and dirty side of the market-based approach to valuations: caveat emptor vs. caveat venditor, het prof Nel die gevare uitgelig wat verbonde is aan die gebruik van veelvoude as 'n waardasiebenadering wanneer 'n maatskappy, of 'n aandelebelang in 'n maatskappy, waardeer word. Hy het spesifiek na die slaggate verwys wat ter sprake is by portuurgroepseleksie, konvensionele veelvoude, saamgestelde konstrukte en intramodelleringsinkonsekwenthede.

Prof Nel het verskeie toekennings ontvang, onder meer vir beste referaat, uitmuntende onderrig en rektorstoekennings vir uitnemende prestasie. Hy het ook heelparty navorsingsverslae vir The Economist Group saamgestel, is hoofredakteur van die South African Journal of Accounting Research, en besoekende hoogleraar aan die Universiteit Stellenbosch Bestuurskool (USB).

• Kliek hier om meer oor prof Nel se intreerede te lees.

• Foto deur Anton Jordaan: Prof Soon Nel by proff Nico Koopman, viserektor: sosiale impak en transformasie, en Ingrid Woolard, dekaan van die Fakulteit Ekonomiese en Bestuurswetenskappe.