Die Universiteit Stellenbosch, in samewerking met die Wes-Kaapse Regering se Naskool-Spelwysiger-program, Gemeenskapskas en Rutgers Universiteit (VSA), het pas ‘n spesiale program bekend gestel vir mense wat leerders uit voorheen benadeelde skole steun deur hulle ná skool bloot te stel aan sport, kuns, akademiese verryking, lees en lewensvaardighede. 

Die Uitgebreide Onderwys-opleidingsprogram wil erkenning gee aan die onbesonge helde wat hierdie belangrike werk verrig en ook aan hulle die geleentheid bied om hulself beter te bekwaam. Dit sal hulle toerus om kwaliteitprogramme te ontwikkel en aan te bied ten einde ’n beter ervaring aan leerders te bied asook die gaping in agterstand te oorbrug.

Saam met sy vennote het die US die eerste 57 mense wat gekies is vir die 18-maande lange sertifikaatkursus op 20 November verwelkom. Die kursusinhoud fokus op die ontwikkeling van verskeie vaardighede, onder meer hanteer van kompleksiteit, probleemoplossing, besluitneming, bestuur van verskille, totale kindontwikkeling, projekbestuur en administrasie.

“Die waarde van hierdie program lê in die manier hoe dit diegene wat so ‘n deurslaggewende rol in die ná-skool omgewing speel verder bemagtig en hul kapasiteit uit brei,” sê Chrischar Rock, Programbestuurder vir die Uitgebreide Onderwys-opleidingsprogram, wat geleë is binne SUNSEP, die Universiteit se Sentrum vir Pedagogiek wat gehuisves is binne die Fakulteit Opvoedkunde.

“Deur die ontwikkeling en akkreditasie van die program wys die US dat ons ernstig is om uitting te gee aan ons Sosiale Impak Stategiese Plan juis omdat ons op die gebied van onderwys ‘n verskil maak in verskillende gemeenskappe,” meen dr Leslie van Rooi, Seniordirekteur vir Sosiale Impak en Transformasie. “Dat ons dit juis in vennootskap kan doen, ontsluit soveel ander moontlikhede.”

Leerders van voorheen benadeelde agtergronde het ’n 6 000-uur opvoedingsgaping teen die tyd wat hulle hoërskool bereik. Hierdie agterstand sluit in voorlees van stories tuis, vroeë kinderontwikkeling, gesinsvakansies, besoeke aan museums, parke en galerye en buitemuurse aktiwiteite. Uitgebreide onderwysbeamptes help om hierdie gaping te oorbrug deur leerders ná hul amptelike skooldag bloot te stel aan sport, kuns, akademiese verryking, lees en lewensvaardighede. 

Die Wes-Kaapse Regering se Hoofdirekteur vir die Naskool-Spelwysiger-program, Jacqui Boulle, sê hulle is verheug om met die Universiteite van Stellenbosch en Rutgers saam te werk ten einde die Uitgebreide Onderwys-opleidingsprogram bekend te stel. “Hierdie pionierswerk gee mense in die sektor die geleentheid om hulself te ontwikkel en terselfdertyd die steun wat hulle aan leerders bied, uit te brei. Dit is die eerste stap in ‘n groter projek om die sektor uit te bou en te professionaliseer.”

Die program bestaan uit vyf blokke waar deelnemers vir vier of vyf dae klas bywoon, asook selfstudie en take in die student se eie tyd.

Hoewel ná skoolse-aktiwiteite leerders se middae vul met positiewe en verrykende aktiwiteite, is die onderliggende doelstellings om die houding teenoor leer te verbeter, beter skooluitslae te verseker en kans-gedrag te verlaag.