Prof. Harald Pasch,
uitgelese professor wat ook die SASOL navorsingsleerstoel in Analitiese Polimeerwetenskap
by die Universiteit Stellenbosch (US) beklee, het die Suid-Afrikaanse Chemiese
Instituut (SACI) se goue medalje vir 2017 gewen.
Die SACI se
goue medalje word allerweë beskou as die hoogste vorm van erkenning deur die
Suid-Afrikaanse Chemie-gemeenskap vir navorsingsbydraes van uitstaande gehalte.
Dit
is die derde keer in vyf jaar wat hierdie gesaghebbende prys aan ’n navorser in
die US se Departement Chemie en Polimeerwetenskap toegeken word. Prof. Len Barbour
wat die Suid-Afrikaanse Navorsingsleerstoel (SARChI) in Supramolekulêre Chemie beklee,
was die wenner van hierdie medalje in 2014. En in 2013 het Prof. Bert Klumperman
(SARChI in Gevorderde Makromolekulêre Argitekture) dit gewen.
Prof. Pasch is in 2008 in die US se Departement
Chemie en Polimeerwetenskap aangestel as die bekleër van die SASOL Navorsingleerstoel
in Analitiese Polimeerwetenskap en hoof van die Afdeling Polimeerwetenskap.
Sedertdien het sy navorsingsgroep, wat fokus op gevorderde polimeeranalise,
gegroei tot een van die internasionaal toonaangewende groepe wat navorsing doen
in die studieveld van polimeerfraksionering en -karakterisering.
Sy huidige navorsing fokus op multidimensionele
vloeibare chromatografie, gevorderde spektroskopie, die ontwikkeling van
analitiese metodes vir nanomateriale en hoë deurvloei- eksperimentering.
Vloeibare chromatografie is ’n skeidingstegniek wat
algemeen gebruik word in die analise van polimere volgens hulle molekulêre
grootte, chemiese samestelling en molekulêre argitektuur. Alle fisiese
eienskappe van polimere, sowel as die hele bestek van polimeertoepassings (motorvoertuie,
lugvaart, geneeskunde, mikroëlektronika ens.) is afhanklik van hierdie
molekulêre parameters. Hierdie skeidingstegnieke is onontbeerlik vir die
onderlinge afhanklikheid tussen molekulêre strukture en fisiese eienskappe.
In die Pasch-navorsingsgroep word verskillende
vloeibare chromatografiese tegnieke gekoppel met mekaar in multidimensionele
skeidingsopstellings Sodoende word nuwe analitiese tegnologieë vir komplekse
polimere ontwikkel.
Prof. Pasch was ook die mede-outeur van twee van
die nuutste en belangrikste handboeke in hierdie vakgebied, naamlik: Multidimensional
HPLC of Polymers (Springer, 2013),
saam met dr. Bernd Trathnigg van die Universiteit van Graz in Oostenryk; en Advanced
Separation Techniques for Polyolefins (Springer, 2014),
saam met prof. Muhammad Imrak Malik van die Universiteit van Karatsji in
Pakistan.
Prof. Pasch het al meer as 300
ewekniebeoordeelde navorsingsartikels gepubliseer, waarvan 81 tussen 2012 en
2015 verskyn het. Hy word dikwels na nasionale en internasionale konferensies
genooi as hoof- of gasspreker. Hy was al studieleier vir meer as 50 nagraadse
studente (waaronder ook Duitse studente) van wie baie tans leiersposisies in
groot maatskappye beklee.