’n Feniks wat verrys
uit die as.
Dit is hoe prof
Johan Malan, waarnemende dekaan van die Fakulteit Ekonomiese en
Bestuurswetenskappe aan die Universiteit Stellenbosch (US), die nuwe en
verbeterde Van der Sterr-kompleks beskryf het by ’n funksie ter viering van die
heringebruikneming van die gebou.
Rolspelers wat betrokke
was by die herontwerp en herbou van die Van der Sterr-gebou – insluitend senior
universiteit- en fakulteitbestuur, verteenwoordigers van die universiteit se fasiliteitsbestuursafdeling,
lektore, studente en borge – het Vrydag, 28 Julie vir hierdie heuglike
gebeurtenis in die voorportaal van die gebou bymekaargekom.
Die gebou, wat
die Skool vir Rekeningkunde en die Departemente Logistiek sowel as Statistiek
en Aktuariële Wetenskap huisves, is op 22 Februarie 2015 in ’n brand verwoes.
“Ons was gelukkig
dat die brand op ’n stil Sondagoggend uitgebreek het en nie gedurende die week
nie – wanneer tot 2000 mense per uur hierdie kompleks gebruik. Niemand is
beseer nie, maar die skade was aansienlik,” onthou prof Stan du Plessis, die US
se aangewese bedryfshoof en dekaan van die fakulteit ten tye van die brand.
Ná baie
aanbiedings van hulp deur ander fakulteite sowel as die breër gemeenskap en
menige ure se harde werk, het die fakulteit daarin geslaag om die ontwrigting
van die akademiese program tot ’n minimum te beperk.
Lesingfasiliteite,
sowel as personeellede van die Skool vir Rekeningkunde se kantore, is deur die
brand vernietig en die Suid-Afrikaanse Instituut vir Geoktrooïeerde Rekenmeesters (SAICA) het
in daardie stadium sy eie ondersoek ingestel om seker te maak dat die Skool in
staat sou wees om sy program aan te bied.
Die feit dat die BRekHons-klas van 2015 uiteindelik vroeg in 2016 die beste
slaagkoers – 94% – uit 14 SAICA-geakkrediteerde universiteite in SAICA se aanvanklike bevoegdheidstoets (ITC) behaal het, getuig van
die Fakulteit en die Skool vir Rekeningkunde se harde werk.
Ná die brand het belanghebbendes besluit om
die Van der Sterr-gebou nie bloot te herbou nie, maar dit te
moderniseer, te verbeter en sy kapasiteit te vergroot. Dit is gedoen deur die gebou uit te brei om vir meer mense voorsiening te maak, dit met 21ste eeuse tegnologie toe te rus
en die omgewingsvoetspoor van die fasiliteit ter wille van volhoubaarheid te beperk.
’n Drieverdiepinggebou is in die binneplein opgerig met twee nuwe
ouditoriums – een met sitplek vir 300 mense en een met sitplek vir 250 mense –
en ’n lesingsaal met sitplek vir 80 mense. Daar is ook verskeie kleiner
klaskamers.
Hierdie nuwe lesinglokale verhoog
die Fakulteit se onderrigvermoë en dien as ’n katalisator vir die bekendstelling van die jongste inligting-
en kommunikasiepraktyke, soos gemengde leer, mobielvriendelike klaskamers en die grootskaalse
uitbreiding van Wi-Fi-tegnologie.
Hysers is
geïnstalleer om toegang tot alle vloere te verseker en personeel se welwees is
ook in berekening gebring met stortgeriewe wat in die badkamers aangebring is
om personeel in staat te stel om fiksheid by hul daaglikse roetines in te sluit,
sowel as kamers waar ma's hul babas kan voed.
Die nuwe
lugversorgingstelsel gebruik waterverkoeling, wat aansienlik laer druk vereis
en baie minder energie gebruik.
Prof Wim de
Villiers, Rektor van US, het gesê dat elke probleem gesien moet word as ’n
geleentheid om met innoverende denke na vore te kom.
“Dit is presies
hoe ons Fakulteit Ekonomiese en Bestuurwetenskappe en ons Afdeling
Fasiliteitsbestuur op hierdie verwoestende brand gereageer het.
“Uit die as het
daar ’n plan verrys om nie net die skade te herstel nie, maar ook die
Universiteit se vermoë te versterk om ’n plek van uitnemendheid en ontdekking
vir studente sowel as personeellede te wees.”
- Foto's (deur Hennie Rudman):
- Hooffoto: V.l.n.r.: Prof Stan du Plessis, aangewese US bedryfshoof, fakulteitsbestuurder MJ Brooks, Marie Malherbe van die dekaanskantoor, visedekaan prof Ronel du Preez, en prof Wim de Villiers, vise-kanselier en rektor van US staan voor die hoofingang van die Van der Sterr-kompleks.
- Foto regs: Lede van die studentekomitee van die Fakulteit Ekonomiese en Bestuurswetenskappe het ook die heropening van die Van der Sterr-kompleks bygewoon. V.l.n.r. is Waylon Wentzel (tesourier), Tayla Steyn (voorsitter) en Sefako Mathibe (ondervoorsitter) van die komitee.