Prof. Jannie Hofmeyr, uitgelese
professor in biochemie en biokompleksiteit by die Universiteit Stellenbosch, is
as die nuwe president van die Royal
Society van South Africa
(RSSAf) verkies.
Die RSSAf wat reeds uit die 1820s
dateer, is een van die oudste wetenskapverenigings in Suid-Afrika.
Prof. Hofmeyr, mededirekteur van
die Sentrum vir Komplekse Sisteme in Transisie by die US, sê dit is vir hom ’n
eer om president te wees van ’n vereniging wat so ’n groot impak op die
wetenskappe in Suid-Afrika gehad het.
Hy benadruk egter dat die rol van
wetenskap as ’n waardige bron van betroubare inligting nog nooit so belangrik
was as nou nie.
“Ons leef in ’n tyd waar die
bydrae en belangrikheid van wetenskaplike navorsing bevraagteken word, waar die
internet besaai is met sogenaamde ‘alternatiewe feite’ en pseudowetenskap ‒ veral met betrekking tot gesondheid
en dieet. Ons word voortdurend gebombardeer met stories van twyfelagtige
herkoms wat as die waarheid voorgehou word.”
Hy glo die RSSAf het ’n
belangrike rol om te speel in openbare uitreike deur verstaanbare en feitelik
korrekte verduidelikings vir wetenskaplike kwessies te bied. In hierdie verband
het die RSSAf se openbare lesings en kollokwiums wat deur sy takke landwyd
georganiseer is, reeds ’n enorme bydrae gelewer. Die RSSAf reël ook jaarliks ’n opstelkompetisie vir
skole.
Gedurende sy termyn as president
sou hy graag wou hê dat die RSSAf ook fokus op die ondersteuning van
wetenskapsjoernalistiek in die gedrukte, sowel as elektroniese media: “Wetenskapsjoernalistiek
lê my na aan die hart, aangesien ek reeds meer as 15 jaar lank betrokke is by
’n radioprogram wat wetenskapgefundeerde antwoorde verskaf op luisteraars se
vrae oor natuurverskynsels. Suid-Afrika se wetenskapsjoernaliste is yl gesaai
en hulle het ondersteuning nodig.”
Die Universiteit Stellenbosch is
goed verteenwoordig in die RSSAf se topstruktuur. Prof. Dave Richardson, direkteur
van die NNS/DWT Sentrum van Uitnemendheid vir Indringerbiologie (SIB) by die US,
is visepresident, terwyl prof. Bert Klumperman, uitgelese professor in chemie en
polimeerwetenskap, die redakteur van die RSSAf se publikasie, Transactions of the Royal Society
of South Africa
is.